في هذه المقالة ستجد كل ما يدور في ذهنك حول أجهزة الكمبيوتر الاستيراد المتواجدة في السوق المصري لكي تكون دليلك الشامل عن أجهزة الكمبيوتر استيراد الخارج ، وحتى لا تقع في حيرة الشراء او الاستغناء ، لذلك سوف أكمل المقالة بالعامية لسهولة وصول المعلومة اليك ، وهذه الطريقة الأفضل لكل من يريد المعرفة .
مصدر أجهزة الكمبيوتر استيراد الخارج
كل اجهزة الكمبيوتر الخاصة بشركة اتش بي hp او غيرها من منافسيها بتيجى استيراد من دول مختلفة زي المانيا وامريكا والصين وحتى كمان بتيجى من دول عربية واشهر الدول العربية المصدرة للأجهزة دي لجمهورية مصر العربية تحديد هي الامارات العربية المتحدة وخاصة من دبى .اين كانت تعمل اجهزة الكمبيوتر الاستيراد
جميع الأجهزة الاستيراد اللي بتيجى من الخارج سواء من دول عربية او اجنبية كانت تعمل لدى شركات حكومية او بنوك او شركات خاصة،
يعنى كانت شغالة شغل خفيف جدا للأعمال اليومية سواء لطباعة أوراق او لكتابة مقالات او للدخول على السيستم المركزي للشركة
لذلك بتلاقي الأجهزة دي الغالبية العظمى منها حالتها ممتازة من الداخل ولو حتى كانت من أجيال قديمة ،
هل اجهزة الكمبيوتر الاستيراد تصلح للاستعمال مرة أخرى
شوف ياصديقى انت ممكن تكون بتفكر في رد للسؤال دا زي كدة مثلا، لا طبعا دى أجهزة عفى عليها الزمن وبقالها في السوق سنين كتير جدا ومهلوكة شغل ومن المستحيل الاعتماد عليها في شغل او العاب ،طيب بص خلينى اوضحلك حاجة في البداية .انت في المدونة دي هتشوف ردود انت مش هتلاقيها في مكان تانى والرد على السؤال دا هتكون بناءا عن تجارب على ارض الواقع وموثقة بفيديوهات لتجارب الألعاب والشغل عليها ولك انت القرار، لكن قبل ما اسيبلك لينك الفيديو اللي بيوثق كلامي خلينى ارد على السؤال بشكل علمي وعملي :-
- أولا : انت مش مضطر ابدا انك تشترى جهاز مستعمل في إي صورة سواء استيراد او تجمعية مستعملة من جيل قديم إلا في حالة واحدة. وهيا ضعف ميزانيتك ودا الشيء الوحيد اللي بيجبرك انك تروح لسوق المستعمل .
- ثانيا : جهاز الكمبيوتر الاستيراد زيه زي الجهاز المجمع قطعة قطعة لو في نفس الجيل وبينطبق عليه كل المشاكل والعيوب والمميزات اللى بتنطبق على الجهاز المجمع ولكن ببعض الاستثناءات واللى هتعرفها في السطور الجاية .
- ثالثا : الكمبيوتر الاستيراد مازال بيقدم أداء ممتاز في الشغل والألعاب لاصحاب الميزانيات الضعيفة ودا هثبتهولك بالفيديو مش هيبقى مجرد مقاله بتقراها وخلاص .
- رابعا : كل الكلام اللى بتشوفه على السوشيال ميديا من زم في الأجهزة دى كلام من مراجعين او مستخدمين ليس لهم تجارب حقيقية مع الأجهزة الاستيراد بدليل انك لو فكرت تكتب على اليوتيوب ارخص تجميعة استيراد هتلاقى فيديوهات كتير لمراجعين مشهورين جدا بيحذروا من الأجهزة دى وفى نفس الوقت انت بتشوف أداء للأجهزة دى مرضى جدا في اللى انت محتاجة بردة على نفس المنصة سواء في العاب او شغل وبميزانيه معقولة وهنا انت بتقع في حيرة ما بين الشراء او الاستغناء .
اجهزة الكمبيوتر الاستيراد المستعمل فى مصر
تعقيبى على كل ما تراه على اليوتيوب هو ان غالبية المراجعين بيروحوا يشتروا اضعف الموديلات وأسوأ الحالات المتواجدة في السوق واظهارها للمستخدمين على انها هيا دى الأجهزة الاستيراد أسلوب غريب جدا ،لكن هنا هتلاقى كل الموديلات اللى تصلح للعمل والألعابوكل موديل موجه لمين من المستخدمين ومش بس كدة كمان هتلاقى كل الطرق الصحيحة اللى بتخليك تقدر تحدث في جهازك بكل سهولة، الكلام دا هنا في مدونتنا فقط مش في مكان تانى شرحنا لكل ما يدور في عقلك هيكون بكل حيادية وامانة، وكمان هنساعدك في التحديث الصحيح لجهازك وخليك فاكر اننا مش تجار ولا بنفكر نبقى تجار.
هل اجهزة الكمبيوترالإستيراد دى بتقبل تحديثات في القطع ؟
نعم الأجهزة بتقبل تحديث للقطع ولكن بمواصفات معينة وعن فهم اللي خلاني اقولك عن فهم لان بشوف ناس كتير يبقى معاها أجهزة استيراد من الجيل الرابع والجيل السادس وبتفكر تحدث الجهاز للجيل العاشر ولو اكتشف ان الطريقة مش هتنفع او شاف ان الجهاز لا يدعم بياخد فكرة سيئة عن الأجهزة دي، المستخدمين المبتدئين غالبيتهم على عدم دراية بان شركة انتل تدعم على السوكيت الواحد جيلين فقط سواء في أجهزة استيراد او أجهزة مجمعة قطعة قطعة على سبيل المثال :-
الجيل التانى والثالث الاتنين يشتغلوا على نفس المازر بورد والجيل الرابع والخامس نفس الامر والجيل السادس والسابع على مازر بورد والجيل الثامن والتاسع على مازر بورد واحدة، كدة هتلاقى ان شركة انتل تدعم جيلين على نفس السوكيت فقط .
معنى كدة ان الأجهزة الاستيراد او المجمعة أجهزة واحدة تدعم نفس المعالجات ولكن لو شوفنا الأجهزة الاستيراد هتلاقى منها موديلات عديدة في السوق منهم اللى ينفع للاعمال المكتبية ،ومنهم أجهزة ورك ستيشن والاتنين ليهم مواصفات واحدة في القطع ولكن التصميم لكل جهاز مختلف عن الاخر، على سبيل المثال جهاز مثل جهاز :-
جهاز كمبيوتر استيراد hp600G1
الجهاز دا مشهور جدا في السوق المصرى لسعره المناسب ودعمه للجيل الرابع من معالجات انتل مواصفات الجهاز كالتالى :-- CPU- core i5-4590
- Ram – 8 gb
- Hdd – 500gb
- SSD – 128 gb
- Psu – 320 watts
الجهاز بدون كارت شاشة خارجي
مواصفات الجهاز المذكورة قادرة على تشغيل الألعاب بسلاسة مع وجود كارت شاشة مناسب للبورسبلاي المرفق في الجهاز والباور صبلاى في الجهاز ده قدرته 320 وات، يقدر يشغل كروت شاشة مقبولة جدا في العاب الشوتر او بعض الألعاب التقيلة ،الخطأ اللى بيقع فيه بعض المستخدمين هو شراء كارت شاشة بسحب طاقة عالية وتركيبة في الجهاز، وطبعا دا بيكون لود كبير على الباور، وقتها هتلاقى فيه مشاكل كتير بتقابلك في الجهاز زى الشاشة السوداء او الشاشة الزرقاء او حتى عطل كامل في الباور صبلاى وخلافه من المشاكل الشهيرة للجهاز دا ومن امثلة الكروت دى واللى بتبقى من فكرة تجار ليس لهم علاقة بالمجال :-- rx 570
- Rx 580
اما بالنسبة لفكرة التحديث في جهاز زى hp 600G1
فهو يقبل التحديث على نفس الجيل وبيعطى أداء افضل ليك من المواصفات المذكورة سابقا
على سبيل المثال افضل مواصفات لجهاز
جهاز كمبيوتر استيراد Hp 600G1
كالتالى ...- CPU – core i7-4790
- Ram 16 gb
- SSD - 256 gb
- Hdd - 2Tb
- VGA – gtx 1060 3gb – rx 560 4gb
وده جهاز اعمال مكتبية ويمكن فيه التحديث على نفس الجيل ،الفكرة هنا انك لوعندك تجميعة من نفس الجيل ولكن مش جهاز استيراد مش هتقدر تحدث لجيل اعلى من الجيل الرابع برده ولكن الميزة الوحيدة هنا هيا حرية تحديث كارت شاشة اقوى من المذكورين ،ولكن بتكلفة مالية اكبر بفارق كبير، لكن ياصديقى فيه موديلات اخري في نفس الجيل الرابع بمزود طاقة اكبر في القدرة الكهربية ومساحات اكبر في الجهاز وهذا مثال على جهاز اخر من نفس الجيل
جهاز كمبيوتر استيراد Hp z230 workstation
الجهاز دا ممكن يكون افضل للألعاب عشان السوكيت بيدعم معالجات انتل من الجيل الرابع وأيضا معالجات زيون E3 واللى بتبقى بذاكرة كاش اعلى من معالجات الجيل الرابع الاعتيادية، ومزود الطاقة بيكون بقدرة كهربية اكبر بتوصل ل 400 وات، ودا بيكون افضل لو حبيت تشتري كارت شاشة اقوى من المذكورين قبل كدة ، غير ان الجهاز دا بيكون في المساحات أوسع من جهاز Hp 600g1 وقتها بتقدر تشتغل بحرية اكبر وفارق التكلفة المالية على نفس المواصفات فارق بسيط جدا .دى مقالة ثابتة عل المدونة ياصديقى واللى هتلاقي فيها الخلاصة في أجهزة الكمبيوتر استيراد الخارج، طيب احنا اتكلمنا عن مميزات الأجهزة دى ومصدر الأجهزة دى بتجي من أى دولة وكانت بتستخدم فى ايه .
عيوب اجهزة الكمبيوتر الاستيراد في مصر
تعالى اقولك على العيوب الموجودة في الأجهزة عشان تشوف ان كانت مناسبة ليك ولا لا اشهر العيوب الموجودة في الأجهزة الاستيراد هيا مزود الطاقة الضعيف وتصميم الجهاز المملوك للشركة المصنعة للجهاز واللى بتكون بتنفرد بيه عن باقى الشركات ولكن مقابل دا بيبقى السعر مناسب لغالبية المستخدمين هتلاقى منهم اللى بيناسبه الجهاز ومش بيبقى شايف ان مشكلة الباور بالنسبالة مؤثرة اوى لانه في اى حال من الأحوال مش هيستخدم الجهاز في اعمال شاقة تجبره على التحديث الملحوظ في جهازه وغالبا هتلاقى شريجة كبيرة من المستخدمين بنفس التفكير، وشريحة تانية عندها طموح التطوير ولكن الميزانية بتبقى حكماهم .ملخص اجهزة الكمبيوتر الاستيراد
في نهاية الموضوع حببيت اقولك ان المقالة دى ما هيا الا عبارة عن توضيح مكثف للناس اللى عندها حيرة في اختيار الأجهزة دى او نظيرها ولكن كن على علم بان الأجهزة المجمعة باجيال جديدة افضل بكتير في الأداء لان من البديهى لاي شخص ان التطور التكنولوجى بيكون شيء عظيم ولكن الميزانية هيا الحكم فى النهايةدى روابط لفيديوهات موجودة على القناة عندنا لبعض الأجهزة دى وادائها
متنساش تقولنا رأيك في اى كومنت على المدونة
يشهد السوق المصري على وجود العديد من الأجهزة الكمبيوتراستيراد الخارج، والتي تتميز بتنوعها وامكانياتها المختلفة. ولكن من المهم أن يقوم المستخدم بعمل بعض الأبحاث والمقارنات قبل شراء أي جهاز كمبيوتر.
- أولاً، يجب على المستخدم تحديد الاستخدام الرئيسي للكمبيوتر، سواء كان للاستخدام المنزلي أو التجاري أو الألعاب. ومن ثم يجب النظر في الميزانية المتاحة لشراء الجهاز.
- ثانياً، ينبغي على المستخدم الاهتمام بالمواصفات الفنية للأجهزة المختلفة، مثل المعالج ووالرامات والهارد ديسك وكارت الشاشة. ويمكن للمستخدم البحث عن أفضل الأجهزة المتاحة في السوق ومقارنة المواصفات والأسعار.
- ثالثاً، يجب الانتباه للضمان وخدمات ما بعد البيع المتوفرة لاجهزة الكمبيوتر استيراد الخارج ، حيث يجب على المستخدم الحصول على ضمان لمدة كافية ومن مصدر موثوق.
- وأخيراً، يجب التأكد من موثوقية البائع وسمعته في السوق، حتى لا يقع المستخدم في حيرة الشراء أو الاستغناء عن جهاز كمبيوتر غير ملائم لاحتياجاته.